تبلیغات
ایزلریمیز - بولود و دوزلو دنیز..

ایزلریمیز

دیلیمیز گؤزل و اؤزل دیر

 

بولود و دوزلو دنیز..

 

نوشته شده توسط:سارای سولدوزلو، آی سو

بولود و دوزلو دنیز..

گؤزونو آچدی، آلنینین ترینی سیلیب گونشه دئدی:« بیراز یاواش، یوخسا منی اؤلدورمک ایسته ییرسن؟» گونش گولوب دئدی:« سیغیناجاق تاپماسان کسینلیکله آرادان گئتمه لیسن» سوردو: سنه می سیغینا بیلره م؟» گونش اوجادان گولوب دئدی «هاهاها! سنله من هئچ زامان بیر یئره ییغیشماریق، دوزدور کی وارلیغینا منه موحتاجسان آما «دنیز» اولماسا بؤلوک-بؤلوک بؤلونوب آرادان گئدرسن! سنین آنان دنیزدیر، آختار اؤز دنیزینی تاپ جوجوق!»
بالاجا آغ بولود بو سؤزدن قورخدو آما اومودون الدن وئرمه دی، یولا دوشوب گئتدی...
یولونداغ بیر بیچینچی گؤردو دوداقلاری سوسوزدان قوپ-قورو قوروموشدور. عایله سی سو گتیرینجه اونون باشی اوستده دایاندی... گئدرکن اومود گولوشونو بیچینچی نین دوداغیندا گؤروب سئویندی. دؤنوب سوروشدو: «دنیزدن خبرین وار؟» بیچینچی باشینی آشاغی سالیب اوزگون-اوزگون الینده کی سویو بالاجا بولودا وئریب دئدی:« بو یولو دوز دوتوب گئتسن دنیزه یئتیررسن.. بیزیم سالامی یئتیریب دئ چوح اوزگونوخ..» بولود شاشقینجا یولا دوشوب گئتدی،یولوندا  بیر فیلامینقو بالاسینا توش گلدی کی یئل ائوینین آغزیندا کی کؤلگه لیگی قوپاریب اونو ایستی گونه تاپشیرمیشدیر، بالاجا قوشون حتی گوجو یوخویدو باغیریب یاردیم ایسته سین. اونون آناسی گلنه کیمی اوستونه کؤلگه سالیب اؤلومدن قورتاردی، آناسی گلیب گؤردوکده چوخ تشکور ائله دی. بالاجا بولود سوردو« آنام دنیزی تانیرسان؟» قوش آغلاییب دئدی« فیلامینقونون سالامینی دنیزه یئتیریب دئ ایلده گؤروشونه گلیب سندن چوخلو فایدالانیردیم آما ایندی... ایلک فورستده گؤروشونه گلیب آغزیمدا سنه سو گتیرمه لی اولسام گتیره جه یم، اینان کی دونیا بئله گئتمه یه جک...»
بالاجا بولود یولدونون داوامیندا بیر چایا توش گلدی، چای اهتیراسلا آشیب داشیردی آجی لاردان دویموش کیمی عوسیان ائتمک ایسته ییردی.. قورخو ایله چای دان دنیزین ایزینی سوروشدو. چای هندورینده کی دووارلاری هیرسله سیلکه له ییب، بیر باغیرتییا یاخین سسله دئدی:« دنیزه دئ بیر گون بوتون دووارلار سؤکوب گؤروشونه گله جه یم، من دنیزین سئودالی سی یام! ایکی آیاقلی اینسان سانیر منی باغلاماق لا گوجومو آلیر، آما منین عوسیانیمی گؤرمه ییب...» بالاجا بولود یولونو دوتوب گئتدی، بیر بالاجا اوشاغا یئتیشدی کی آناسی دوکتوردن گئجیکمیشدیر اودا قورخوب آغلاییردی، آناسی گلینجه اونا لای لا دئییب باشینی قاتدی، خسته آنا گلیب بولودو گؤروب تشکور ائله دی، بالاجا بولود بو آنادان آناسی نین ایزینی سوروشدو. آنا آغلاییب دئدی :« هر ایل یای دا گئدردیک گؤل قیراغینا، دولانیب ایستیده اؤزوموزو دالغالارینا تاپشیراردیق منیم خسته لیگیمه بؤیوک درمان ایدی، آما بو ایل آدام اورا گئدنده داریخیر، بیز دنیزین باغیریب یاردیم ایسته مه لرین گئج ائشیتدیک، یئنه نه گوجوموز وار ییغیب اونون یاردیمینا گله جه ییک..» بالاجا بولود قادین گؤرستدییی یولو دوتوب گئتدی..       
یولدا بیر باغبانی گؤردو کی آغاجلاری دوزلو یئللرین قاباغیندا تاب گتیرمه ییب قوروموشدورلار... باغچی دان سوروشدو «سن دنیزین یئرینی بیلیرسن می؟» باغچی آغلار گؤزلرله دئدی« قیمتینی بیلمه دیک، بیله سین  یالقیز قویدوق...» باشلادی اوجادان آغلاماغا...
یولوندا چوخلارینی گؤردو، هرکس دنیزین یاخشیلیغیندان سؤز آچیب گله جکده اونون یاردیمینا گلمه یه سؤز وئریردی، بولود یولوندا بیر آغ یئره یئتیردی، آغ دوزلاغا باخدیقجا اوردان قورخوردو، آجی آغری سسی گیردی اوردان، جینایت قوخوسو..، بیر خسته نین باشینا درد یاغیردی و یارالارینین درین اولدوغو سوسوز دوداقلاریندان بللی ایدی، یالقیزلیق بو خسته نین باخیشلاریندا سان وئریردی...، بولود بورادا آما هئچ نه دئیه بیلمه دی. اییلیب خسته نین دوزلو دوداقلاریندان اؤپدو..، خسته کی محبت گؤزلریندن دامیردی اؤز بالاسینی تانیییب گولومسه دی. بولود اؤزونه گلیب سوردو:« دنیز سن می سن؟» دنیز یورقون سسی ایله دئدی:« گئتسم بو دوزلار بو ائلی آرادان آپارار، اونلاردا من کیمی کیمسه سیزدیرلر...» بولود دئدی:«اونلار سنی یاردیم ائتمه یی گله جه یه تاپشیریرلار بونسوز کی بیر گله جکده اولا، سن ندن سون نفس لرینده ده ایسته ییرسن اونلاری یاردیم ائده سن؟ اونلار سنی بو آجی دوشمانین ایچینده یالقیز قویوب سنه یاردیمجی گلن سولارین یولونو باغلاییب لار...» دنیز دئدی« اونلارین هامی سی منیم یولداش لاریمدیرلار و منیم الیمدن آنجاق بو گلیر... اونلارین دا الیندن آدیمی هرتیریبون دا باغیریب سسیمی دونیایا چاتدیرماق، گؤزلیم! اونلارین ایچینده ائله یولداش لاریم وار کی یولداش لیغیمیزین درین لییی بوتون دنیزلردن درین دیر... گله جکده دونیا بیزیم سسیمیزی ائشیدیب دوشمانیمیزا قارشی دوراجاق لار... گله جک ده...»


یازار: آی سو






 
لبخندناراحتچشمک
نیشخندبغلسوال
قلبخجالتزبان
ماچتعجبعصبانی
عینکشیطانگریه
خندهقهقههخداحافظ
سبزقهرهورا
دستگلتفکر