تبلیغات
ایزلریمیز

ایزلریمیز

دیلیمیز گؤزل و اؤزل دیر

 

خوش گؤردوک

 

نوشته شده توسط:سارای سولدوزلو، آی سو

خوش گؤردوک
تانرینین آدیلا

یولداش لاریمیز؛ بو وئبلاگا خوش گلیبسینیز

 

بیز   چالیشاجاغیق  بو وئبلاگدا  توركجه  شئعرلر،

 

حیكایه، ادبی متن و مقاله، چئویرمه و... توپلایاق. 

 

دیه رلی یولداشلاریمیز لوتفن بیزی یاردیم ائدین


یازی یوللاماقلا،یورملارینیزلا و گؤروشلرینیزله



سیناو

 

نوشته شده توسط:سارای سولدوزلو، آی سو

سیناو


سحر یئلی پرده نی قولچاق کیمی اوینادیردی، آچیشقانین هر بوجاغیندان ایچه ری یورویوب یورقون هاوایا یئنی جان وئریردی. هاوادا یورقون اولا بیلر؟ هه یورقون اولار، یولچو یورولماز اولسا هاوانی دا یورار.
کیتابا باخدی، یالنیز اون واراق قالمیشدی سونا چاتسین، آما یورقون کیرپیک لری گؤزلرینین آیاغینا دوشموش، یالواریب یاتماق ایسته ییب اونا اوخوماق ماجالی وئرمیردی. دئیسن یئل گؤزونون پرده سینی ده اوینادیردی، ساعات 6:33 گئچیردی، دوروب اوزونو یویوب یئنه اوخوماغی باشلادی، آخی اؤزونه سؤز وئرمیشدی سیناودا بیرینجی نومره نی آلسین، سؤزونون اوستده دورماماق اونا اؤلومدن پیس ایدی، سونوندا دوشوندو کیتابین تومونو اؤیره نیب. سئینیب بیلیم یوردویا گئتمه یه حاضیرلاندی، بیر لیوان سود ایچیب یولا دوشدو
سحرین سرین یئلی دریسینی سیغیشدیریردی، سوبح خلوت خیابان لاردا آتدیم آتماغی چوخ سئویردی و آتدیم آتارکن سئودیی ماهنینی تیکرارلاییردی:«چیرپینیردی قارا دنیز... » اورک دویونتوسو اوندان قرار آلمیشدی بیلمیردی ندن بئله اولور بو سیناو اونو گله جه یه توکدویو پیلانلارا یاخینلادیری، آما بیلمیردی ایندی ندن اوره یی بئله دویونور، تبسسومله زیمزیمه ائتدی «قارا دنیز یوخسا منین اوره ییم؟؟»
بیلیم یوردودا یولداشلاریلا گؤروشدو بیلمه دیک لرینی بیربیریندن سوروشوب یانیت آلدیلار.
سیناو باشلانارکن سورولارین تومونه باخدی، تومونو باشاریردی، هاوانین بیر گؤزل دادی وارییدی... 
یولداش لاری سؤز وئرمیشدی لریاخشی نومره آلسا، ارشد سیناوینا باخمایاراق یئنه اولارا قاتیلا بیلر.. سئوینجله یانیت یازماغا باشلادی؛ بیر.. لیکی.. اوچ..
اوچونجو سورویا یئتیرنده  قیزاران آیین(خوردادین) اوچو یادینا دوشدو، هئچ زامان او گونو اونودا بیلمیردی هر «اوچ» سؤزونو ائشیتدیینده ایستر- ایسته مز خوردادین اوچو یادینا دوشوردو و او گونون شهید لری... گؤزوندن بیر داملا یاش آخدی، تیکرارلادی:«قانیمین سون داملاسی بو گؤز یاشیم کیمی آخسادا یولونوز هر زامان داواملی دیر...»
یئنه سورولاری یانیتلاماغا باشلادی، آما بیر آن هاوادا بیر آغیرلیق حیس ائتدی، باش قالدیریب اوچ امنییتی قووه نی باشی اوستده گؤردو، اونا «دور!!» حوکمو وئردیلر. شاشقین جاسینا سینو کاغیذینا باخدی، ایییرمی سورودان یالنیز اوچ سورونو جاوابلاییب نئچه آلا بیلردی؟؟ «یالنیز اوچ!!»  یولداشلارینا وئردییی سؤزو یئرینه یئتیر مه میشدی آما بو اوچون اونا باشقا بیر دادی واریدی...


یازار: آی سو



دویون

 

نوشته شده توسط:سارای سولدوزلو، آی سو

دویون


منه ایناندیرمیشدین کیمسه منی سئومه ز، ایناندیرمیشدین منله ایلگیده اولان ارکک لر منی آلداتیب گئده جکلر. سن آجی بیر خاطیره اولوب یاشاییشیمدان گئتسنده بئله بو سؤزون ایچیمده بیر درین ایز بوراخمیش اونون ایچینده اوره ییمی بیر سیر اولاراق گیزله میشدیم و هئچ ارککه ایزین وئرمیردیم بو سیرلاری آچسین. اوزون موددت اؤزومه ایناندیرا بیلمیردیم سن اؤزونو ملک تانیتدیرام، تمی و ایلقارینا باغلی قالان اوغلان!! منی آلداتیب گئدیبسن. بو اساسدا سنین دؤنمه یینی گؤزله ییردیم، اؤزومدن سوروردوم هانی گلدی؟؟ دئمیشدی تئز گله جه یم، بس هاردا قالدی؟
من بی قارانلیغا دوشموشدوم کی چیخا بیلمیردیم، هر طرفه آتدیم آتیردیم اوچوروم قورخوسو واریدی...
سن ائله ایددیعالی اولدوغوندا، ائله داوراندین کی سندن سونرا کیمسه یه اینانا بیلمیردیم، منه ساری گلن هر کس زهر قوخویوردو، گؤزومه هر باخان باخیشدان خیانت یاغیردی، سئوگی سؤزو ائشیدنده آجی دوشونجه لر بئینیمی سانجیردی، قارا بیر اؤرتوک اوزومو توتموش، گؤزلریمین اؤنون قارا باخیشلارین بوروموشدو، قارانلیق گئجه لریم قورتولماق ایسته میردی، که دریم سونسوزویدو سانکی.. و سن یوخویدون اللریمی دوتوب ایستی تبسسومونله اوره ییمین بوزلارینی اریده سن، گئجه ایله ساواشیب منی قارانلیقدان آلاسان.
بیر گون سن ائله پیس دئدیک لرینین بیری الیمی دوتوب منی بو قارانلیقدان چیخارتدی، ایسته مه سمده منه اومود وئریب، یاشاییشیما اومود گتیردی، سنه گووه ندییم قدر اوندان قورخوردوم، آما هئچ اینجی مه دی، هئچده اوزولمه دی، ان اؤنملی سی هئچ منی آلداتمادی دا. او منی اؤزوم ایچین سئویر، بیر اینسان کیمی یاشاییر و منله بیر اینسان کیمی داورانیر و من اونو اونداندا چوخ سئویرم.

یازار : آی سو





اورمویا گل...

 

نوشته شده توسط:سارای سولدوزلو، آی سو

اورمویا گل..


اورمویا هاچاغ گله جکسن سئوگیلیم؟ سوردوم هاچاغ گله جکسن، ایسته دیم بیر شئی تاپشیرام، بیر شئی کی سن یاشایان یئردن باشقا یئرده تاپیلماز. ایسته ییرم دئییم گلنده اونودا گتیر. سئوگیلیم؛ ایندیه دک سندن هئچ نه ایسته مه میشم، آما ایندی دئییرم یئنه اورمویا گل، اورمویا تئز-تئز گل، گلنده اؤزونوده گتیر، آخی هر یانی آختاردیم آما اؤزون هئچ یئرده تاپیلمیسان، اونون ایچینده اؤزونو سنه تاپشیردیم، اؤزونو گتیرمه ییده سنه...
جانیم بو طرفلره چوخ گل، اوره ییم یامان داریخیر سنه، هر آن سنی گؤرمک ایسته ییرم، اللرینی اللریمده دوتوب بو شهرده دولانماق ایسته ییرم، بیلمیرم ندندی سنی، هر زامان یانیمدا دوشونورم بو شهرین هر کوچه سینه آیاق آتدیغیمدا سن منینله سن، هر نه یه باخدیغیمدا سنین باخیشینین تاییدین ایزله ییرم، توم ثانیه لریم سنله گئچیر... آما اؤزومه گلدیییمده سن یوخسان...
سنی بو شهرده گؤزله ییرم و بیلیرم بو یاخیندا سنله بو شهرده، شهرچاییندا گؤروشه جه یم. خوشاکویا گئتمه سکده، دوققوز پیلله دولابلاری بیزه یئتر، بنده گئتمه یه واختین اولماسادا، اورمان پارکینین گون باتان لار اوقدر گؤزل دیر کی بیر دونیایلا دییشمک اولماز. شور گؤلونون سون نفس لری اولسادا بئله یئنه گؤرمه لی دیر....
گل؛ اؤزونوده گتیر، اورمو هله ده گؤزل دیر و اورمودا بیر قیز الینده چیچک، چای قیراغیندا سنی گؤزله ییر، سنی اؤزله ییر، تئز گل..

یازار: آی سو



دئیم گله جك سن

 

نوشته شده توسط:سارای سولدوزلو، آی سو


دئیم گله جك سن


گؤزوم دوشدو تزه آیا

دئدیم هلبت گله جكسن

قند الیمدن دوشدو چایا

دئدیم یقین گله جكسن

 

اولدوزلاردان نور سوزولور

اوره گیم هئچدن اوزولور

قاب- قاشیق ردیف دوزولور

دئییرم دای گله جك سن

 

گؤروشوندن پای اومموشام

گلیرسن گل یورولموشام

گینه سؤزومده دورموشام

گله جكسن، گله جك سن

 

دئدیلر كی عشقه دالیب

اؤزگه سینه شوراه سالیب

گؤزلرینده گؤزوم قالیب

اینانمیرام گله جكسن

 

گلدیم گؤروم سؤزلر دوزدو؟

اوره ییمی كدر اوزدو

سئوینج منه دوداق بوزدو

نه جور دئییم گله جك سن؟؟

سحر خانیم




من کی سن دئییلم...

 

نوشته شده توسط:سارای سولدوزلو، آی سو

من کی سن دئییلم... 

اونوتمادی گوزلرینی گوزلریم

منیم گوزوم سنین گوزون دئییل کی

او یئرلری ناخیشلاییر ایزلریم

منیم ایزیم،سنین ایزین دئییل کی

 

یانلارا اؤیرتمه دیم دیلیمی

منیم دیلیم،سنین دییلین دئییل کی

هر یئته نه اوزاتمادیم الیمی

منیم الیم،سنین الین دئییل کی

 

اوچوب گئتدین سازاق دوشدو کونلومه

منیم قلبیم ،سنین قلبین دئییل کی

سن گولوش چون یارانیب سان،اینله مه

منیم غمیم ،سنین غمین دئییل کی

 

سن قارالتدین،من آغارتدیم ساچیمی

منیم ساچیم،سنین ساچین دئییل کی

ائشیدنلرباغیشلاییرسوچومو

منیم سوچوم،سنین سوچون دئییل کی

 

یئره دوشدو،اودلو سوزوم کوزه ردی

منیم سوزوم،سنین سوزون دئییل کی

قارشیلاشدیق،دیل سوسدو ،اوز قیزاردی

منیم اوزوم،سنین اوزون دئییل کی

 

سن یولونو دییشدیردین بیرسحر

منیم یولوم،سنین یولون دئییل کی

بوهیجرانا دؤزه جه یم بیر تهر

!دوزه جه یم،هیجران اولوم دئییل کی

(نصرت کسمنلی)





یاردیم

 

نوشته شده توسط:سارای سولدوزلو، آی سو

یاردیم

 

        کپز قافقاز،

                 اورال آلتای،

آنا دولو داغلاریندان، دوغان گونش

         گونئی ده کی قارانقولوق اوبالارا

                نور ساچماقدان، اوشونورمو؟؟!

 

شاعیر: بابک اسدی



...

 

نوشته شده توسط:سارای سولدوزلو، آی سو

...

آیریلیغین باغرینا، آتدی منی گئتدی یار

حسرت ایله نیسگیله، قاتدی منی گئتدی یار

وئرمه میشم وئرمه رم،بیر توكون بیر دونیایا

بیر ماشینا، بیر ائوه، ساتدی منی گئتدی یار
َ..



اومود

 

نوشته شده توسط:سارای سولدوزلو، آی سو

اومود

 

  قورد اوركلیم، آرخاداشیم

       كدرلنمه گؤز یاشیما

          اینان اودلو باخیشیما

              سانجیلانمیش كؤپك كیمی

                   باغیراجاق اؤنوموزده

                         یاغی دوشمن.

 

شاعیر:بابك اسدی



...

 

نوشته شده توسط:سارای سولدوزلو، آی سو

...

بوراسی یئنیلنمز قارداشیم!

آرینمام

 اوداسی توز باسمیش  گئجه مین پنجره سیندن

سوپورولمم

یاتاغیمدا جان وئره ن شئعیر لرین گنجلییینده ن

كویدن ـ كویه داشینان منلیییمی

چرچی لر تاباغیندا ساتامام قارداشیم !

زهر كیمی قاینایان گئچمیشیمی، دونیانین چاناغینا ،

                                                      قاتامام قارداشیم !

دونیا یئنیلندی...

اوكسوز گونشین آلوولانان ساچینا ،خینا گولو تاخدی می

یوخسا اوتانجاق اولدوزلارین سوپ ـ سوغوق دوداقلارینا...

بوراخ

یئنیلنمز

بوراسی یئنیلنمز قارداشیم!

قارانلیق

سالخیم چیچكلی اولكرلرین،قاداسینی آلان گئجه دن

اللریم

اللریم خینالی قالان گئجه دن

بوراسی یئنیلنمز

                        یئنیلنمز قارداشیم !

 

شاعیر: ائلناز ایسلاموند

 



بوراسی اورمو

 

نوشته شده توسط:سارای سولدوزلو، آی سو

بوراسی اورمو

تپ تمیز بیر دویغو

دویدون دویمادیغین بو

بوراسی كلفچه میزین پوزولاسی

بوراسی یابانجی دیلده تانیشلیق بوراسی اورمو ........





سن

 

نوشته شده توسط:سارای سولدوزلو، آی سو

سن

 ان گؤزلییدین چیچك لرین...

هئپ حوزون قوخوساندا....

و حسرتله سولانساندا باغریمدا

سولماسین دئیه یوزون،

هر گون یئنیدن اؤزلریم سنی...

بلكی یئنیدن دئمك،

حایال بئله دئییل آرتیق...

بلكی آدینی آنماق،

سنی یاشاماق كادار زور...

یینه ده،

سن ان گؤزلییدین چیچكلرین...




sevgi

 

نوشته شده توسط:سارای سولدوزلو، آی سو

sevgi





Keçib getdi

 

نوشته شده توسط:سارای سولدوزلو، آی سو

Keçib getdi


Keçib getdi,

min il, yüz il;
Keçib getdi,
on il, son il.
Keçib gedir
son ay, son gün,
son dəqiqə, son saniyə.
Əsim-əsim əsir səsim,

Axı əsir səsim niyə?

Mən əsrimin əsiriyəm,
Mən əsrimin əsəriyəm.

Yaxşım, pisim -

Fikirlərim, duyğum, hissim,
Ömrüm-günüm, əsərlərim,
əsəblərim,

Ağrılı-acılı sirlərim, -

Nəyim yoxdur, nəyim vardır -
Bu yüz ildən yadigardır.
Tərk edirəm diri-diri

İyirmini -

İki mini.
Tərk edirəm vətən kimi
Ümidimi, diləyimi

yeni əsrə daşıyıram, -

Düşmənlərin acığına
yaşamışam, yaşayıram.
İyirmi bir - yeni vətən,
Min illərin sərhəddini mən aşacam.

Yaşamışam, yaşayıram,

yaşayacam.

                                                           

 



اینسان دوشونجه لی قیز

 

نوشته شده توسط:سارای سولدوزلو، آی سو

اینسان دوشونجه لی قیز


قارشیندا بویون بوروب

دایانماقدان چوخ سئوینیرسن

ائله دئییل می؟

بیر کیشینین غرور گوزگوسینی سیندیرماقدان

سئوینیرسن،گولورسن

ائله دئییل می؟

آنجاق گوزگونون سینیغیدا گوزگودو

بونو دوشون:

دالغالانیر هر بیر تیکه سینده

سئودا اوچرومونون صداقت دالغاسی

او بیر اوغلانین سئوگی معناسی

یقین چکمگ ایسته ییرسن دارا

او قاپ – قارا

نیفرت باخیشلی گوزلرینین اوستونده اولان

کامان قاشلاروین اورتاسیندا

بلکده گوزلرینی بئزه ین

مسموم سورمه نین گوجیله

اولدورمک ایسته ییرسن

منیم غرورومو،

منیم بو صاف، صادیق ،درین دویغومو

اولمز، اولدوره بیلمز

منیم دویغومو

سنسن لئنز قویدوغون او  قارا گوزلر

و بالدان آجی دئدیگین سوزلر

سئوینمه بوش یئره

ای فیمینیزم دوشونجه لی قیز

قالمایاجام کی یالقیز

سئوه جه یم دنیزی ماوی

اوفوقو سئوه جه یم قیپ – قیرمیزی

سئومه یجم کی سنی

سئوه جه یم

اینسان دوشونجه لی قیزی

شاعیر: هاشیم موغانلی


 



گئت

 

نوشته شده توسط:سارای سولدوزلو، آی سو

 گئت

گئتمگ ایسته ییرسن

بهانه ایله گئت

هایلا گئت

اویاد مورگولو خاطیره لری

نه سسین همن سسدی

نده کی باخیشین

گئدیرسن ایکیسی ده یوخ اولسون باری

سن چیچکلر ایچره بیتمیش

هرزه بیر آلاق

نه قیشین وار نده کی یازین

بیلمیردین پاییزدا چیچکلر سولاجاق

سیناجاق سنین او کوک سیز سازین

گئتمگ ایسته ییرسن

هم دانیش همده دین

قوی بیلسین عالم

سن سئون دئییلدین

قوی بیلسین کی

سن دیرچه لمگه گوبه لک کیمی

ییخیلمیش آغاج گوزله ییردین...

شاعیر: هاشیم موغانلی




  • تعداد کل صفحات:4 
  • 1  
  • 2  
  • 3  
  • 4